Шығыс Қазақстан облысында Мемлекеттік кеңесші Ерлан Қаринның қатысуымен бірқатар кездесулер өтті, деп хабарлайды aqshamnews.kz
Алдымен, Ерлан Қарин облыс әкімі Ермек Көшербаев және мемлекеттік органдар басшыларымен ішкі саясат мәселелері бойынша жиналыс өткізді. Онда азаматтық қоғамды дамыту, жастарды қолдау және ел бірлігін нығайту мәселелері талқыланды. Сонымен қатар, Президент бастамаларының жүзеге асырылу барысы мен идеологиялық жұмыстың маңызды бағыттары сөз болды.
Ұлттық құрылтай мүшелері жергілікті сарапшылармен кездесіп, өңірдегі қоғамдық-саяси ахуалға қатысты мәселелерді көтерді. Олар бірлескен іс-қимылдың форматын талқылап, зерттеу жұмыстарына қатысты пікір алмасты.
Сонымен қатар, Мемлекеттік кеңесші өңірдегі Қоғамдық кеңес өкілдерімен кездесу өткізіп, Президент Жолдауындағы экономикалық реформаларға назар аударды. Ерлан Қарин еліміздің экономикалық өсіміне ықпал ететін маңызды шаралар қатарында энергия қуатының жаңа көздерін дамыту, атап айтқанда, атом электр станциясын салудың маңыздылығына ерекше тоқталды.
Кездесулердің мақсаты — жергілікті қоғаммен диалогты нығайту және өңірлердегі әлеуметтік мәселелерді шешу үшін ұсыныстар әзірлеу болды.