Еңбек күні мен «Жұмысшы мамандықтар жылына» орай Алматы қаласының еңбек мобильділігі орталығы жалпықалалық бос жұмыс орындары жәрмеңкесін өткізді.
Іс-шара Арбат алаңында мерекелік атмосферада өтіп, ондаған ірі компанияны, мемлекеттік ұйымдарды, кәсіпорындарды және жұмыссыз азаматтарды біріктірді. Жұмыс берушілер мен үміткерлер арасында тікелей сұхбаттасу болып, бос жұмыс орындары туралы өзекті ақпарат алуға мүмкіндік берілді.
Алматы – елдегі ең қарқынды дамып келе жатқан әрі жастар көп шоғырланған қалалардың бірі. Статистикаға сәйкес, мұнда 700 мыңнан астам жас азамат тұрады, олардың шамамен, 400 мыңы – 14 пен 29 жас аралығында. Солардың ішінде 12,5 мыңнан астамы жұмыссыз болса, NEET санатындағы жастардың саны – 40 мыңға жуық. Осыған байланысты үміткерлерге 300-ден астам бос жұмыс орны ұсынылып, түрлі салалар бойынша 2000- нан аса қызмет орны қамтылды. Олардың ішінде өндіріс, өнеркәсіп, құрылыс, көлік пен логистика, сауда және қызмет көрсету, денсаулық сақтау, білім беру, энергетика, ақпараттық технологиялар, мәдениет және қоғамдық тамақтану салалары бар.
– Біз «ЭФКО» ірі өндірістік компаниясына қоғаммен байланыс жөніндегі және сату жөніндегі менеджерлерді, нарықты талдау бөлімінің маманын, операторларды, химиялық талдау зертханашылары және жүк тиеушілерді жұмысқа шақырамыз, – деп атап өтті персоналды іріктеу жөніндегі менеджер Карина Плотникова.
Қазақстанда бөтелкедегі су мен сусындар өндіруге маманданған басқа компанияға орта біліммен «экспедитор» болып жұмысқа тұруға болады. Тек қана «В», «С» санатындағы көлік құралдарын басқару куәлігінің болуы, жүргізуші мамандығы бойынша кемінде бір жылдық еңбек өтілі, жергілікті жерді жақсы білу және қаланы меңгеру қажет. Сонымен қатар, жиын барысында қолдан жасалған бұйымдар жәрмеңкесі де өткізілді. Онда кәдесый қорапшалары, гипстен жасалған бұйымдар, тақия, шамдар және тағы басқа көптеген өнім сатылды.