Жол қызметтері күшейтілген режимде жұмыс атқаруда.
Ақмола, Ақтөбе, Қостанай және Қызылорда облыстарында боран мен қалың қар салдарынан тасжолдағы көріну нашарлап, бірқатар жол учаскесінде қозғалысқа шектеу енгізілді, деп хабарлайды Аlmaty-akshamy.kz «ҚазАвтоЖол» мекемесінің баспасөз қызметіне сілтеме жасап.
Жол қызметтері барлық учаскелерде күшейтілген режимде жұмыс атқаруда.
Автокөліктің барлық түрі үшін күре жолдардың келесі учаскелері жабық тұр:
Ақмола облысында қозғалыс «Қостанай-Әулиекөл-Сурған» тасжолының Қостанай облысының шекарасынан Сурған кентіне дейін шектелді.
Ақтөбе облысында «Самара-Шымкент» күре жолының Белогорка кентінен Қызылорда облысының шекарасына дейінгі аралығы жабылды. Сондай-ақ, «Қарабұтақ-Комсомол-Денисовка-Рудный-Қостанай» трассасының Қарабұтақ кентінен Қостанай облысының шекарасына дейінгі аралығы жабық тұр.
Қостанай облысында «Қарабұтақ-Комсомол-Денисовка-Рудный-Қостанай»; «Денисовка-Жетіқара-Мықтыкөл»; «Қостанай-Әулиекөл-Сурған» тасжолдарының учаскелері жабылды.
Қызылорда облысында «Самара-Шымкент» автожолының Ақтөбе облысынан Арал қаласына дейінгі аралығында қозғалысқа шектеу енгізілді.
Күре жолда штаттан тыс жағдай туындаса немесе тасжолдардағы ахуал туралы қосымша ақпарат алу үшін 1403 қысқа нөміріне қоңырау шалу қажет!