Ал биыл дүние есігін ашатын 10 Құнанбайға журналист Нұрсейіт Жылқышыбай 300 мың теңгеден берем деп отыр.
Бұдан бұрын кәсіпкер Дулат Тастекей Абайдың 180 жылдығына керемет бір бастама көтеріп, 2025 жылдың 10 тамыз күні дүние есігін ашқан барлық Абайларға 180 мың теңгеден беретінін айтқан, деп хабарлайды aqshamnews.kz
Нұрсейіт Жылқышыбай баласының атын Құнанбай деп қойған он адамға «Аламан» компаниясының атынан 3 млн теңге, яғни әр адамға 300 мың теңгеден береді. Журналист бұл идеяны кәсіпкер Дулат Тастекейден алған екен.
"Кәсіпкер Дулат Тастекей ағамыз Ұлы Абайдың 180 жылдығына керемет бір бастама көтеріп жатыр екен. 2025 жылдың 10 тамыз күні дүние есігін ашқан барлық Абайларға 180 мың теңгеден бермек екен. «Асылтас» қорының бұл бастамасын мен де өз шама-шарқымша қолдаймын. Бірақ... ", -дей келе өз шартын фейсбук арқылы жариялады.
"Қазақта Абай деген ат аз емес. Ал Құнанбай ше? Алда бір жазғанымдай Құнанбай, Дөнентай, Тұрсын сынды қазір қазақы аттар қойылмай кетті. Есесіне арабша аттар қаптады. Бұл бір. Екіншіден Абайдың Абай болуына ықпал еткен әкесі. Емендей берік, бәйтеректей зор Құнанбай! Қарадан шығып хан болған. Әділдікті қақ жарған шешен әрі балуан болған тұлға!" -деп жазды Н. Жылқышыбай.
Баласының атын Құнанбай деп қойған ата-ана 300 мың теңгені алу үшін Құнанбай деп қойғанын дәлелдейтін туу туралы куәлікті Н. Жылқышыбай көрсеткен WhatsApp номеріне жіберу керек. Бұл шара 1 наурыздан басталады.
Ұлттық статистика бюросындағы ақпарат бойынша, елімізде 1-18 жас арасында Құнанбай есімді 135 бала бар. Құнанбай есімді 22 баланың жасы – 3-те, бір Құнанбай 12-де болса, біреуі – 13-те екен.
