Қазақстанда жеке процедурлық кабинеттерге жүргізілген тексерістер нәтижесінде 15 миллион теңгеден астам айыппұл салынды, деп хабарлайды Aqshamnews.kz тілшісі.
Денсаулық сақтау министрлігінің мәліметінше, тексеріс барысында лицензиясыз немесе қажетті қосымшаларсыз жұмыс істеген, сондай-ақ түрлі заңбұзушылықтарға жол берген 406 объект анықталған. Түсіндіру жұмыстары жүргізілгеннен кейін 247 кабинеттің қызметі өз еркімен тоқтатылған.
«Процедурлық кабинеттер – эпидемиологиялық тұрғыдан жоғары категориядағы нысандар. Олар денсаулық сақтау субъектілеріне қойылатын барлық талаптарға сай болуы тиіс. Орта буындағы медицина қызметкерлеріне лицензиясыз инвазивті процедуралар жасауға рұқсат етілмейді. Алайда бірқатар кабинетте мұндай қызметтер заңсыз көрсетілген», – деп хабарлады министрлік.
Қалған нысандар бойынша тексерістер жалғасып жатыр. Бүгінге дейін 84 объектіге жоспардан тыс тексеру жүргізіліп, келесі заңбұзушылықтар анықталған:
- медициналық қызметке лицензияның болмауы;
- санитарлық талаптардың сақталмауы;
- дәрі-дәрмектерді дұрыс сақтамау;
- білікті персоналдың жоқтығы;
- жедел көмекке арналған қажетті жабдықтардың болмауы.
Тексеріс нәтижесінде 122 әкімшілік хаттама толтырылып, жалпы сомасы 15 миллион теңгеден асатын айыппұл салынған. Министрлік жеке кабинеттерді тексеру жұмыстарын жалғастырып жатыр.
