Қазақстан дәрі-дәрмек көлемінің 1,6%-ын немесе 25 түрін Украинадан алып келген.
ҚР Денсаулық сақтау министрі Ажар Ғиният мәлімдеуінше, Қазақстан Украинадан дәрі-дәрмек жеткізетіндермен келісімшартты біржақты тәртіпте бұзып жатыр, деп хабарлайды Almaty-akshamy.kz
«Иә, бүгінгі таңда геосаяси жағдай өте күрделі. Бірақ біз, абырой болғанда, барлық препарат пен медициналық бұйымға қажеттілікті өткен жылы конкурс өткізіп, препараттың 94-ін сатып алған едік. Бүгінгі таңда «СК-Фармация» қоймалары мен хабтарға барлық препараттың 50%-ы жеткізілді. Пациенттерге қажет препарат маусым айының соңына дейін жетеді», - деді министр.
Айтуынша, Қазақстан дәрі-дәрмек көлемінің 1,6%-ын немесе 25 түрін Украинадан жеткізіп келді. Осы жылдың басында Украинадағы жеткізушілер Қазақстанға бұл көлемнің 40-70%-ын жеткізген.
«Бүгінгі таңда зауыттар жабық. Біз біржақты тәртіппен келісімшартты бұзып жатырмыз және қалған көлемге конкурс өткіземіз. Біз бұл жұмыстарды 1 шілдеге дейін аяқтап, дәрімен қамтамасыз етеміз», - деді А.Ғиният.
Сонымен қатар, министрдің айтуынша, ведомство дәрі-дәрмектің шекті бағасын индексациялауды қарастырып жатыр.