Бірегей жоба тәмамдалды
«Қазақ тіліндегі 100 жаңа оқулық» жобасы қорытындыланды, деп хабарлайды Almaty-akshamy.kz.
Әлемнің үздік оқулықтары жарты миллионнан аса қазақстандық студенттің қолына тиді. «Жаңа гуманитарлық білім. Қазақ тіліндегі 100 жаңа оқулық» жобасы қорытындыланды. Тәржімалау жұмыстарын «Ұлттық аударма бюросы» ұйымдастырды. 100 кітап 4 жылда толық тәржімаланды.
Әр оқулық 10 000 данамен шығып, еліміздің оқу орындарына таратылған. Электронды нұсқалары «Қазақстанның ашық университеті» порталына орналастырылып, еркін қолданысқа берілді. Онлайн тұғырнамаға жүз мыңнан аса қолданушы тіркелген. Былтырғы оқу жылының өзінде ондағы курстар 2 млн рет пайдаланылған.
Бұл елімізде бұрын-соңды қолға алынбаған кешенді жобаның ғылыми қазақ тіліне салған олжасы мен кәдеге жараған ауқымының көрінісі.
«Оқулықтардың негізінде қазіргі заман талабына сай қашықтан оқуға арналған онлайн курстар дайындалды. Атап айтатын болсақ, әр оқулықтың негізінде бейнедәрістер дайындалып, жалпы саны 200 курс, 5 мыңнан аса бейнедәріс жасалды. Олар, әсіресе, пандемия кезінде қашықтан оқуға өткен кезеңде студенттерге, оқу орындарына өте жақсы көмекші құрал болды деуге болады», - деді «Ұлттық аударма бюросы» ҚҚ атқарушы директоры Рауан Кенжеханұлы.