2026 жылғы 21 ақпан сағат 08:30-дағы жағдай бойынша республикалық маңызы бар автожолдардың бір бөлігінде қозғалыс ашық болса, кейбір бағыттарда ауа райының қолайсыздығына байланысты уақытша шектеулер енгізілді, – деп хабарлайды aqshamnews.kz.
Қостанай, Шығыс Қазақстан, Абай, Батыс Қазақстан, Ақтөбе, Ұлытау және Қызылорда облыстарының бірқатар учаскелерінде барлық көлік түрлері үшін қозғалысқа рұқсат берілген.
Ал Ақмола, Павлодар, Қостанай, Ақтөбе, Қызылорда және Абай облыстарының кей жол бөліктерінде боран мен көктайғақ салдарынан жол жабылды. Павлодар облысындағы «Қалқаман» көлік айрығында көпір құрылысының зақымдануына байланысты қозғалыс шектелген. Сондай-ақ Шығыс Қазақстандағы Осинов асуында жүк көліктерінің тіркемемен жүруіне маусымдық шектеу қойылды.
Жүргізушілерге жолға шығар алдында бағыттағы ахуалды нақтылап, қауіпсіздік талаптарын сақтау ұсынылады.