Экс-министр Ажар Ғиният ауыр жарақат алған Алуаның қазіргі жағдайын айтты, - деп хабарлайды aqshamnews.kz.
Бұл туралы ол әлеуметтік желідегі парақшасында бөлісті.
"Кеше әріптестеріммен бірге ауыр жарақат алған Алуа есімді қыздың отбасына бардық. Жол-көлік оқиғасы салдарынан сегіз жастағы бүлдіршін екі аяғынан айырылды", - деп жазды Ғиният.
Оның айтуынша, бұл жағдай болғаннан бастап орталық Алуаға қажетті көмекті көрсету жолдарын қарастырып келеді. Бастапқыда протез орнатылғаннан кейін кешенді оңалту курсын ұсынуды жоспарланған. Алайда қыздың анасы Махаббаттың уайымы мен Алуаның мазасыз күйі көмекті дәл қазір бастау қажет екенін көрсеткен.
"Қазір Алуа қалалық ауруханада ем алып жатыр. Кеше анасы Махаббатпен кездесуде ауруханадан шыққан соң қызымыз біздің орталықта кешенді оңалту курсынан өтетін болып келісілді. Бұл кезеңде мамандарымыз оның физикалық жағдайын қалпына келтірумен қатар, психологиялық және әлеуметтік бейімделуіне де жан-жақты қолдау көрсететін болады. Алуағы көмек көрсету- біздің кәсіби борышымыздан бұрын, адами жауапкершілігіміз", - деді ол.
Еске салайық, 3 маусымда Астанада жолаушылар мінген автобус жол апатына түсіп, бірнеше адам зардап шеккен еді. Соның бірі – Алуа Бекен екі аяғынан айырылды. Алуаның отбасына 30 млн теңге ақшалай көмек көрсетілді. Кейіннен қала әкімі Жеңіс Қасымбек қыздың отбасына баспана берілетінін айтты.