Екібастұзда сот психоневрологиялық диспансерде 30 жылдан аса уақыт есепте тұрған жергілікті тұрғынға қатысты қылмыстық істі қарады, - деп хабарлайды aqshamnews.kz тілшісі.
IRBIS TV мәліметінше, оқиға 2025 жылғы қыркүйекте болған. Іс материалдарына сай, әйел жұмыстан үйіне келген соң ерлі-зайыпты арасында қызғаныштан жанжал шыққан. Мас күйдегі ер адам қолына шәйнек алып, әйелінің басынан екі рет ұрған. Жәбірленуші есінен танып, бас-ми жарақатымен ауруханаға жеткізілген.
Оқиға бойынша қылмыстық іс қозғалғанымен, сот талқылауы ұзаққа созылмаған. Екібастұз қалалық соты ер адамды ақыл-есі кем деп танып, оған медициналық сипаттағы мәжбүрлеу шараларын қолдану туралы қаулы шығарған.
"Жалпы типтегі психиатриялық стационарда мәжбүрлі ем тағайындалсын", - делінген сот шешімінде.
Ерлі-зайыптының некеде тұрғанына 35 жылдан асқаны белгілі. Сотта жәбірленуші күйеуін өмір бойына емдеуге жіберуді талап ететінін мәлімдеген. Бұл ұстанымды олардың қызы да қолдаған, ол - ер адамның ресми қамқоршысы. Қызының айтуынша, әкесі анасына үнемі күш көрсетіп отырған.
