Австралияда дронның көмегімен 100 млн ағаш отырғызылады
Австралияда ғаламдық жылынумен дронның көмегімен күресуге кірісті, деп хабарлайды Аlmaty-akshamy.kz «Хабар 24»-ке сілтеме жасап.
Жергілікті компания алдағы 2 жылда жүз миллион ағаш отырғызуды жоспарлап отыр. Өздігінен ұшатын құралдар адам мен техника жете алмайтын жерлерге тұқым себеді.
Бір жағынан, бұл жұмыс өте жылдам атқарылады. Мысалы, адам күніне 800-дей өсімдік отырғызса, дрон 40 мыңға жуық тал егуге қауқарлы.
Айта кетейік, әлемде жылда 30 миллиардтан астам тонна көміртегі газы ауаға бөлінеді. Бұған бірінші себеп – жанар-жағармай. Оның үстіне ормандар да аяусыз оталып жатыр.
– Ормандарды қалпына келтіру көміртегі цикліне едәуір әсер етеді. Бұл - климат өзгерісін реттеуде таптырмас әдіс. Неғұрлым көп ағаш отырғызылса, соғұрлым табиғи орта жақсарады. Көмірқышқыл газын азайту арқылы ауаны салқындатуға болады. Аталған істі жыл сайын жүйелі жасау керек. Десе де, бұл ғаламдық жылынудың бірден-бір шешімі емес, - дейді климат өзгерісін зерттеу орталығының директоры Энди Питман.