Еліміздің азаматтарына бірнеше жерде жұмыс істеуге тыйым салынады деген ақпарат көпшіліктің наразылығын туғызды. Наразылыққа себеп – ҚР Еңбек кодексінің кейбір нормаларын азаматтардың дұрыс түсінбеуін туындады. Aqshamnews.kz тілшісі қазақстандықтар бір мезгілде бірнеше жерде жұмыс істей ала ма деген сұрақтың жауабын нақтылау үшін ҚР Еңбек және халықты әлеуметтік қорғау министрлігіне хабарласты.
«ҚР Еңбек кодексіне сәйкес, жұмыскер бірнеше жерде және әртүрлі жұмыс берушіде еңбек етуге құқылы. Бұл жерде ескеретін жай, жұмыс уақыты тәулік ішінде 12 сағаттан аспауы тиіс. Мысалы, қазіргі таңда мидицина қызметкерлері арасында күніне 6 сағаттан 2 ұйымда жұмыс істеу тәжірибесі кең таралағн, ал тазалық жұмыстары бойынша мамандар 3 түрлі жұмыс берушіге 4 сағаттан қызмет көрсете алады. Қызмет саласының ерекшеліктеріне байланысты бухгалтерлер, сантехниктер, электриктер, күзетшілер, бағдарлама жасаушылар, педагогтар, журналистер және өзге де мамандық иелерінің 2-3 жұмыс орнында қатар еңбек ететіні жиі кездеседі. Атап айту керек, 18 жасқа толмағандарға, сондай-ақ ауыр, зиянды, қауіпті еңбек жағдайында еңбек ететін жұмыскерлерге қосымша жұмысқа орналасуға рұқсат етілмейді. Сонымен қатар ҚР Мемлекеттік қызмет туралы заңына сәйкес, мемлекеттік қызметшілерге қосымша жұмыс істеуге тыйым салынады. Өйткені олар педагогикалық, ғылыми, шығармашылық қызметтен басқа ақылы қызметпен айналысуға құқылы емес. Жоғарыда көрсетілген шектеулерге жатпайтын, кәмелетке толған кез келген ҚР азаматы қосымша жұмыс істеуге құқылы.», - деді ҚР ЕХӘҚМ Еңбек инспекциясы комитеті төрағасының орынбасары Ерболат Абулхатин.