Қазақстандық сәйгүлік Қабирхан жүлде қоры 12 миллион долларды құрайтын Dubai World Cup 2024 жарысында бақ сынады.
Бәйгеге барлығы 12 сәйгүлік қатысты. Қабирхан ирландиялық жокей Патрик Доббспен бірге алтыншы нөмірде жарыс жолына шықты. Қазақстандық сәйгүлік 2000 метр қашықтықты 2 минут 5 секундта бағындырып, мәре сызығын сегізінші болып кесті. Бұл нәтиже үшін 120 мың доллар беріледі, деп хабарлайды Almaty-akshamy.kz.
Ал мәреге Лаурель Ривер атты тұлпар бірінші болып келді. Еске салайық, Қабирхан 12 қаңтарда Дубайдағы "Мейдан" ипподромында өткен бәйгеде жеңіске жеткен еді. Кейін ол 26 қаңтарда Дубайдағы Al Maktoum Challenge (1-топ) жарысында жеңімпаз атанып, 1 миллион доллар иеленді. Сондай-ақ қазақстандық сәйгүліктің Dubai World Cup жарысына қатысатыны белгілі болды.