Әйгілі корольдік клуб "Реал Мадрид" Алматыға келіп, желіде қала туралы бірнеше посттар жариялады. Олардың арасында домбырамен ән шырқаған қазақстандық бозбаланы да байқауға болады. 200 миллионға жуық оқырманы бар, әлемнің 15 дүркін үздік клубы атанған "Реалдың" парақшасында төбе көрсеткен жігіт кім? Аqshamnews.kz тілшісі анықтады.
"Сәкен Сейфуллиннің әнін испандықтарға мақтанышпен орындап бердім"
Танымал клубтың парақшасынан көзге түскен жігіттің есімі - Дамир Сарман. Ол Қызылорда облысы, Жаңақорған ауданының тумасы. Қазір Алматыда Абай атындағы ҚазҰПУ-де музыкалық білім беру мамандығы бойынша 4-курста білім алып жатыр. Көпті шулатқан жайт туралы былайша әңігмелеп берді.
"Сол күні достармен аралық бақылауға дайындалып жүргенбіз. Саябақта камера асынған адамдар көзге түсті. Артынша білуімізше "Реал Мадридтің" видеографтары екен. Домбыра тартып тұрғанымызға тоқтап, “ағылшын тілінде сөйлей аласыздар ма?” деп сұрады. Білгенімізше жауап беріп, өтініштері бойынша әнді айтып бердік. Кадрға енер-енбесіміз белгісіз болса да, Сәкен Сейфуллиннің "Тау ішінде" әнін испандықтарға көсіле орындап бердім", - деді ол.
