Ұлттық экономика вице-министрі Б. Омарбековтің айтуынша, ауылдық жерлерде кадрлық әлеуетті арттыру мақсатында жүзеге асырылып жатқан «Дипломмен ауылға» жобасы елдегі ең тиімді әлеуметтік бастамалардың бірі саналады.
Жоба аясында мамандарға әлеуметтік қолдау шаралары қарастырылған:
- 100 АЕК көлемінде біржолғы көтерме жәрдемақы,
- 2500 АЕК-ке дейінгі жеңілдікті несие тұрғын үй сатып алуға беріледі.
2009 жылдан 2024 жылға дейінгі кезеңде:
- 114 мыңнан астам жас маман көтерме жәрдемақы алған,
- 52 мыңнан астам маман жеңілдікті несиеге қол жеткізіп, баспанаға ие болған.
Б. Омарбеков атап өткендей, бағдарламаға қатысушылардың басым бөлігі – жастар, олардың арасында мұғалімдер, дәрігерлер, агрономдар, инженерлер және ауыл шаруашылығы мамандары көп.
Бұл бастама биылғы Жұмысшы мамандықтар жылы жариялануымен ерекше үндесіп отыр. Президент Қасым-Жомарт Тоқаев өз Жолдауында еңбек адамының мәртебесін көтерудің, елді дамыту үшін жұмысшы және техникалық мамандықтарды қолдаудың маңыздылығын атап өткен еді.
«Дипломмен ауылға» жобасы – ауылды жерлердегі кадр тапшылығын азайтып қана қоймай, жастардың туған жерінде еңбек етуге ынталандырудың нақты тетігі. Ол ауылдарда білікті мамандардың тұрақтауына, жаңа жұмыс орындарының пайда болуына және жергілікті экономиканың дамуына серпін беріп отыр.
