Иранның Минаб қаласындағы қыздар мектебіне жасалған әуе соққысынан ондаған баланың қаза табуына байланысты Бала құқықтары жөніндегі уәкіл Динара Зәкиева ресми үндеу жариялады, деп хабарлайды Aqshamnews.kz тілшісі.
Динара Зәкиева білім беру мекемелеріне шабуыл жасау халықаралық құқықты өрескел бұзу екенін атап өтті. Оның айтуынша, балалар кез келген қақтығыста ең әлсіз әрі қорғансыз топ және ересектердің саяси шешімдері үшін жауап бермеуге тиіс.
Иранның Минаб қаласындағы мектепке жасалған соққы салдарынан ондаған оқушы көз жұмып, көптеген бала ауыр жарақат алғаны хабарланған. Бұл жағдай әлемдік қауымдастықтың алаңдаушылығын тудырды.
«Мектеп – бейбітшілік мекені. Білім беру орындарына шабуыл жасау халықаралық құқық нормаларына қайшы. Балалар соғысты таңдамайды және ересектердің әрекеті үшін жауап бермеуі керек», – деді уәкіл.
Ол Қазақстанның кез келген дауды бейбіт жолмен, келіссөздер арқылы шешуді қолдайтынын жеткізіп, халықаралық қауымдастықты балалардың қауіпсіздігін қамтамасыз етуге шақырды.
Уәкілдің ұстанымы бойынша, балалардың бейбіт өмір сүру құқығы қорғалуға тиіс, білім ордалары халықаралық деңгейде қауіпсіз нысан ретінде танылуы қажет және қақтығыстарды тек дипломатиялық жолмен реттеу маңызды.
Динара Зәкиева қайғылы оқиға салдарынан балаларынан айырылған отбасыларға көңіл айтты.