Депутат Ермұрат Бәпи Мәжіліс отырысында Ұлттық қару-жарақ музейін ашуды ұсынды, - деп хабарлайды aqshamnews.kz.
Депутаттық сауалын ол қорғаныс министрі Руслан Жақсылықовқа жолдады.
"Елдің тәуелсіздігін танытатын ресми рәміздер – Ту, Елтаңба, Елұраннан басқа да маңызды қосымша атрибуттар бар. Мәселен, Ұлттық музей, Ұлттық Академия, Ұлттық кітапхана, Ұлттық театр, т.т. Елдің бірегейлігін және жас ұрпақты патриоттық пен ата-бабалар ерлігі рухында тәрбиелеу мақсатында теңдессіз таным орталығы – бұл Ұлттық қару-жарақ музейі немесе Ұлттық қару-жарақ палатасы болар еді", - деді ол.
Ол қай елдерде мұндай музей барын айтты.
"Францияда Орта ғасырдан бергі әскери тарихтың куәсі – Париж әскери музейі бар. Лондондағы Корольдік қару-жарақ палатасы мен Империялық әскери музейі британдық елдік пен ерліктің ерен үлгісін паш етеді. Сол сияқты, Ресейде Кремльдің қару-жарақ палатасы әлемге әйгілі. Көршілес Өзбекстанда Әмір Темір мұражайының бір бөлігі қару-жараққа арналған. Бакудегі Әзірбайжан көшпенділер музейі Түркі мәдениетінің қару-жарағын дәріптеу орталығы саналады", - дейді Бәпи.
Оның айтуынша, тәуелсіз Қазақстанда мұндай ұлттық нақыштағы қару-жарақ музейі атымен жоқ.
"Осындай сұрақтардың негізінде, сіздерден Қазастанда Ұлттық қару-жарақ музейін ашу қажеттігі жөніндегі мүмкіндіктерді бағамдап, Парламент депутаттарына тұжырымды жауап беруді сұраймын. Бұл жауап ресейлік музейдің филиалына байланысты туындаған қоғамдағы қажетсіз қозғалыстың буын басуға ықпал етуі тиіс деп есептеймін!" - дейді ол.