Алматы облысы, Еңбекшіқазақ ауданында дәрігерге қол көтерген ер адам 3 тәулікке қамалды, деп хабарлайды Aqshamnews.kz тілшісі.
Оқиға Еңбекшіқазақ аудандық ауруханасының қабылдау бөлімінде болған. 8 қыркүйекте сағат 17:00 шамасында баласын жарақатымен алып келген ер адам дәрігердің ұсынысына келіспей, оның қызметіне кедергі келтірген.
Травматолог баланың сүйегі сынуы мүмкін екенін айтып, гипс салу керек деген. Алайда әкесі дәрігердің пікіріне қарсы шығып, дау кезінде медицина қызметкеріне айқайлап, жағасынан алады.
Сотта азамат кінәсін мойындап, эмоцияға берілгенін түсіндірген. Дәрігер болған жайтты растады.
Сот материалдарын зерттегеннен кейін, ер адам ҚР ӘҚБтК-нің 80-1-бабының 2-бөлігі («Медициналық қызметкердің заңды қызметіне кедергі келтіру») бойынша кінәлі деп танылып, 3 тәулікке әкімшілік қамауға алынды.
Сот медицина қызметкерлеріне құрметсіздік көрсету, оларды қорқыту немесе күш қолдану заңмен жазаланатынын атап өтті.