2026 жылы Алматы қаласында қала әкімі Дархан Сатыбалдының бастамасы мен тапсырмалары аясында енгізілетін жаңа жобалардың ішінде халықтық, инклюзивтік және осы заманғы спортты дамытуға ерекше назар аударылған.
«Спорт – достық алаңы» жобасы барлық ауданда кең ауқымда іске асып, тұрғындар мен қала қонақтарының оған белсенді түрде қатысуын қамтамасыз етпек. Алматы қаласының Спорт басқармасының басшысы Дархан Нұрханұлы Өңірлік коммуникациялар қызметінде осылай деп хабарлады.
Наурыз айынан бастап Almaty Marathon жобасымен бірлесіп «ACTIVE CITY HUB» бастамасы іске қосылып, әр жексенбі күні сағат 08:00-ден 12:00-ге дейін медиа тұлғалар мен фитнес жаттықтырушылары қатысатын шеберлік сабақтары мен шағын іс-шаралар өтпек.
«Біз бұл іс-шараларға 10 000-нан астам қала тұрғыны қатысады деп отырмыз», – дейді Дархан Нұрханұлы.
Сонымен қатар, Қазақстанның шоу-бизнес жұлдыздарының командалары қатысатын Media Basket баскетбол медиа-лигасы да басталады. Бұл жоба баскетболды танымал етіп, спорт, мәдениет пен медиа арасындағы байланысты нығайта түсу үшін қолға алынып отыр.
«BLAST PREMIER BOUNTY ALMATY» киберспорт турнирін өткізу де ойластырылып жатыр. Қазір жарыстың күні мен өтетін орны анықталды.
«Бұл іс-шара қаланың киберспорт картасында маңызды орын алып, ойыншылар мен көрермендердің назарын аударады», – деді Спорт басқармасының басшысы.
2026 жылы ерекше балаларды спортқа тартуға ерекше көңіл бөлінеді. Арнайы білім беруге мұқтаж балалардың оңалуы, әлеуметтік бейімделуі мен спортқа қатысуына бағытталған балалардың паралимпиадалық спортын дамыту бағдарламасы да осымен қатарласа әзірленіп жатыр.
Гарвард пен Оксфорд университеті қатысатын Дүниежүзілік шахмат универсиадасын өткізу, 20 ел қатысатын әуесқой велоспорттан әлем чемпионатын ұйымдастыру, сондай-ақ студенттік лиганы колледждер лигасына кеңейтіп, шамамен 88 колледж бен 7 мың студентті қамту жағы да қаланың жоспарына кірген.
«Біздің мақсатымыз – спортты қаланың барлық тұрғындары үшін қолжетімді, қызықты ету. Алматылықтардың әрқайсысы дене шынықтырумен айналысуға мүмкіндік алуы керек», – деп түйіндеді Дархан Нұрханұлы.
