Атыраулық суретші желі қолданушыларын таңғалдырды.
Атырауда Sandero маркалы көліктің артқы терезесіне Олимпиада чемпионы Елдос Сметовтің портретін салып алған жүргізуші ел назарын аударды, деп хабарлайды aqshamnews.kz
Ерекше картинаның авторы 34 жастағы атыраулық Аслан Жазиков Елдос Сметовтің Олимпиададағы тарихи жеңісінен кейін шабыттанып, көлігінің әйнегіне чемпионның суретін айнытпай салған. Автордың туындысы сіріңкенің талы мен мақта таяқшасының көмегімен салынған.
"Дзюдошы Елдос Сметовтың Олимпиададағы жекпе-жегін көріп қатты қуандым. Шабыт келіп, бірден көлігімнің терезесіне портретін сала бастадым. Туындым тез әрі оңай жасалды. Осылайша қазақ спортшысына қолдау білдірдім. Қала көшелерінде сигнал беріп, жұмысымды бағалап жатқандар көп", - дейді Аслан Жазиков.
Бұл автордың алғашқы туындысы емес. Бұған дейін ол Елдос Сметовтің және басқа да спортшылардың портретін ағаштан ойып жасаған. Атыраулық жігіт кішкентай кезінен сурет салуға икемі болғанын айтады. Бірақ бағдарламашы мамандығын меңгеріп, қазіргі кезде жеке компаниялардың бірінде стратегиялық даму бөлімінде қызмет атқарады.
"Суретті тек хобби үшін саламын. Ешқандай тапсырыс алмаймын. Ондайға қолым жүрмейді. Шабыт келген уақытта ғана сурет саламын",- дейді ол.
Аслан отбасылы, үш баланың әкесі, балалары да суретке икемі бар екенін айтады. Ал 9 жастағы қызы Дария дзюдомен айналысады, турнирлердің жеңімпазы.