Әлемдік аренада көк Туымызды желбіретіп жүрген, ауыр салмақ дәрежесінде жұдырықтасатын былғары қолғап шебері Еділ Қожамбердиев Алматыда Ұлттық ұланның Бауыржан Момышұлы атындағы 5571 әскери бөлімінің жеке құрамымен кездесті.
Чемпионмен жүздесу барысында сарбаздар сан түрлі сауалын жолдап, екіжақты пікір алмасты. Боксшы Отан қорғаушылармен өмірлік сабақтарымен, алдағы жоспарларымен бөлісіп, құқықтық тәртіп әскерінің жауынгерлеріне жауапты қызметтері үшін ризашылығын білдірді. Мұндай кездесулер Отан алдындағы борышын өтеп жүрген сарбаздарға ерік-жігер, рух, патриоттық сезім сыйлайды деп ойлаймыз.
– Мектеп қабырғасында оқып жүргенде-ақ спорт саласында жарқырауды армандаған едім. Бала күнімнен кик-боксинг үйірмесіне жазылып, арманымның алғашқы баспалдағына қадам жасадым. Арман алдамайды. Тек жүрекпен қалаған мақсат биікке шығарады. Және азаматқа шыдамдылық, қайтпас қайсар мінез тән. 27 желтоқсанда Балуан Шолақ атындағы Спорт сарайында 12 раундық жекпе-жек өтеді. Сол додада мықты-мықты қарсыластармен жұдырықтасамыз. Сіздерді қазақ боксының жанкүйер болуға шақырамын! – деді былғары қолғар шебері.
Айта кетейік, Еділ Қожамбердиев бала күнінен спортқа жақын болған. Аты аңызға айналған чемпион Майк Тайсон мен Мұхаммед Әлидің спорттық жолына теледидар арқылы қызығып, балалық арманын жүзеге асыру мақсатында өз-өзін жан-жақты шыңдаған. Қажырлы еңбек пен шыдамдылықтың арқасында Азия, Әлем чемпионатына қатысып, өзін жеңіспен дәлелдей білді. 2017 жылдан бастан кәсіпқой боксқа бет бұрған.