Бұл туралы ҚР Оқу-ағарту вице-министрі Еділ Оспан Орталық коммуникациялар қызметінде өткен брифингте мәлімдеді. Мұнда елімізде балалар құқықтарын қорғау жүйесін нығайту мәселелері талқыланды, деп хабарлайды
ҚР Оқу-ағарту вице-министрі Еділ Оспан Қазақстанның балалар құқықтарын қорғау бойынша халықаралық стандарттарға бейілділігін растайтынын атап өтті. 2023 жылдың желтоқсанында Бала құқықтары туралы конвенцияның хабарлау рәсіміне қатысты Факультативтік хаттамасы ратификацияланды. Бұл құжат балалардың құқықтары бұзылған жағдайда халықаралық деңгейде шағым түсіруге мүмкіндік береді.
«Биылғы жылдың қаңтар айында БҰҰ-ға мүше мемлекеттер Қазақстанның адам құқықтары мен бостандықтарын нығайтуға, сондай-ақ балалардың құқықтарын қорғауға бағытталған реформаларын бірауыздан жоғары бағалады. Бұл реформалар қоғамның ең осал топтарын қорғауды қамтамасыз ететін ұзақ мерзімді стратегияларды іске асыру жолындағы маңызды қадам болды. Мемлекет басшысының тапсырмасы бойынша елімізде балалардың құқықтарын халықаралық стандарттарға сай жан-жақты әрі тиімді қорғауға бағытталған ауқымды заңнамалық және стратегиялық шаралар енгізілуде», – деп атап өтті Еділ Оспан.
2024 жылы Қазақстанда балаларды қорғауды күшейтуге бағытталған алты негізгі заң қабылданды. Жаңа заңдарға сәйкес, балаларға қатысты кез келген зорлық-зомбылық түрлеріне жауапкершілік күшейтілді. Сонымен қатар, қоғамдық көліктен балаларды мәжбүрлі түрде түсіруге тыйым салынып, ол үшін әкімшілік жауапкершілік енгізілді. Құрылыс компанияларына терезелерге қауіпсіздік механизмдерін орнату талабы заңнамалық түрде бекітілді. Бұл балалардың жазатайым оқиғалардан қорғалуына ықпал етеді. Сонымен бірге, балалар саудасының алдын алу шаралары күшейтілді. Балалар құқықтары жөніндегі уәкіл институтының мәртебесі арттырылып, олар елдің барлық өңірлерінде жұмыс жасай бастады. Бұл балалардың құқықтарын қорғау механизмдерін айтарлықтай нығайтты. Қамқоршылық және қорғаншылық органдарының кадрлық әлеуетін арттыру үшін жаңа норматив енгізілді: енді әрбір 5000 балаға кемінде бір маман бекітілуі қажет. Бұл жаңашылдық бір жылдың ішінде мамандар санын 300-ге арттыруға мүмкіндік берді, нәтижесінде балалардың құқықтарын қорғау деңгейі айтарлықтай жақсарды.
Сонымен қатар, жетім балаларды қолдау мақсатында тәлімгерлік институты енгізілді. Осы бастама аясында 2024 жылы 330 бала жеке тәлімгерлік қолдауға ие болып, олардың қоғамға әлеуметтік бейімделуіне және психологиялық қолдау алуына мүмкіндік жасалды.