Алматыдағы Бұтақты шатқалында 700-ден астам адамды біріктірген ауқымды сенбілік өтті, – деп хабарлайды aqshamnews.kz тілшісі.
Тазалық жұмыстарына әртүрлі діни конфессия өкілдері, қоғам белсенділері, еріктілер және қала тұрғындары қатысты. Қатысушылар қажетті құрал-жабдықтармен қамтамасыз етілді.
Сенбілікке қатысушылар күн сайын мыңдаған табиғатсүйер қауым келетін танымал тау бағытын тазартты.
«Біз Алматы үшін айрықша маңызы бар көркем жерде тұрмыз. Медеу ауданы әкімдігі тарапынан күз мезгіліне дейін бұл аумақтың тазалығын қадағалап, тәртіпті сақтаймыз», – деді Медеу ауданының әкімі Еркебұлан Оразалин.
Бұл аумақтың таңдалуы кездейсоқ емес. Мамандардың айтуынша, әртүрлі дін өкілдерінің алматылықтардың сүйікті демалыс орындарының бірінде ортақ мақсат жолында бірігуі ерекше мәнге ие.
«Алматы – бәріміздің ортақ үйіміз. Қаланың тазалығы мен табиғатты аялау – әр тұрғынның ортақ жауапкершілігі», – деді ұйымдастырушылар.
Қатысушылар үшін сенбілік өтетін орынға барып-қайтуға тегін тасымал ұйымдастырылды.
Көптеген адам үшін бұл сенбілік экологиялық шара ғана емес, нағыз бірлік мерекесіне айналды.