Қазақстанда бұрынғы бас көлік прокуроры Мақсат Дүйсеновке іздеу жарияланды. Ішкі істер министрі Ержан Саденов бұл жағдайға қатысты пікір білдірді , - деп хабарлайды Аqshamnews.kz тілшісі.
Бұл ақпаратты Бас прокуратураның құқықтық статистика және арнайы есепке алу органдарының порталында іздестіру ісі 29 тамызда Алматы қаласы Алмалы аудандық полиция басқармасының бастамасымен прокуратура тарапынан тіркелгені жазылған. 52 жастағы Дүйсенов іздеудегі тұлғалар базасында тұр.
Ішкі істер министрі Ержан Саденов бүгін кулуарда бұл мәселеге қатысты пікір білдірді.
"Іздеу инициаторы біз емес. Қылмыстық іс қозғалғанына байланысты, Сізге (журналистерге - еск.) құзырлы органдарға жүгіну қажет. Иә, іздеу жарияланған. Бұл мәселені бастамашымен бірлесіп шешеміз", - деді Саденов.
Іздеу жарияланған Мақсат Дүйсенов қай бап бойынша күдікке ілінгені белгісіз. Министр Ержан Саденов бұл сұраққа жауап берген жоқ.
Мақсат Дүйсенов туралы не белгілі?
Мақсат Дүйсенов 2018 жылғы тамызда сол кездегі бас прокурор Қайрат Қожамжаровтың бұйрығымен Қазақстанның бас көлік прокуроры болып тағайындалған.
2013–2014 жылдары Қазақстан Республикасы Қауіпсіздік кеңесінің сектор меңгерушісі қызметін атқарды.
2016–2018 жылдары Сыбайлас жемқорлыққа қарсы іс-қимыл ұлттық бюросы басшысының орынбасары болып жұмыс істеді.
2018 жылғы қаңтардан бастап бас көлік прокурорының бірінші орынбасары қызметін атқарған.