Бурабайда, 14 ақпанда жол апаты болып, бойжеткен қыз ауыр жарақат алған. Квадроцикл жоғары жылдамдықпен ағашқа соғылған, – деп хабарлайды aqshamnews.kz тілшісі turar media-ға сілтеме жасап.
Қазір қыз ауыр жарақат салдарынан комада жатыр.
Осы оқиғадан кейін полиция демалыс аймағындағы квадроцикл мен қарда жүретін көліктерді жаппай тексеріп жатыр.
«Ақмола облысының полиция қызметкерлері қарда жүретін көліктер мен квадроциклдердің тексеруін күшейтті. Демалыс аймақтарына, оның ішінде Бурабай курорттық аумағына ерекше назар аударып отырмыз», - деп хабарлайды аймақтың полициясы.
Осы хабарламасында полиция 14 ақпан күні Бурабайда оқыс оқиға болғанын, бойжеткен ауыр жараланып, ауруханаға түскенін хабарлаған. Жүргізуші де жараланған, бірақ, ол есін біледі.
«Осы іске қатысты сотқа дейінгі тергеу басталды. Оның қорытындысы бойынша тиісті процестік шешім қабылданады», - деп хабарлайды Ақмола облысының полициясы.