Түркістан облысында адам ағзасын заңсыз сату дерегі бойынша қылмыстық істі қараған сот материалдарына сәйкес, ер адам өз бүйрегін 13 миллион теңгеге бағалаған, – деп хабарлайды aqshamnews.kz тілшісі.
Тергеу барысында сотталушы 2025 жылдың ақпан айында Telegram мессенджерінде бүйрегін сататыны жөнінде хабарландыру жариялағаны анықталды. Кейін ол жедел-іздестіру шаралары кезінде жасырын түрде әрекет еткен «сатып алушымен» кездесіп, мәміле жасауға келіскен. Ер адам ақшаның алғашқы бөлігі — 5 миллион теңгені қолма-қол алып жатқан сәтінде құқық қорғау органдары тарапынан ұсталған.
Ер адамға Қазақстан Республикасы Қылмыстық кодексінің 116 және 24-баптары бойынша — трансплантациялау немесе өзге де мақсатта адамның ағзаларына қатысты заңсыз мәміле жасауға оқталғаны үшін айып тағылды. Істі қарау қорытындысы бойынша сот қылмыстың орташа ауырлықтағы санатқа жататынын, нақты зардаптың болмағанын ескерді. Осыған байланысты рақымшылық жасау (амнистия) туралы заң нормалары қолданылып, ер адам қылмыстық жауапкершіліктен босатылды, ал іс бойынша өндіріс тоқтатылды.