Премьер-Министр Олжас Бектеновтің төрағалығымен өткен Үкімет отырысында Батыс Қазақстан облысының әкімі Нариман Төреғалиев өңірде зардап шеккендерге өтемақы төлеу және қалпына келтіру жұмыстарының толық аяқталғаны туралы баяндады.
Жалпы сомасы 3,6 млрд теңгеге 9 994 отбасы біржолғы төлем алды. 10 222 отбасына 3,7 млрд теңгеге материалдық өтемақы төленді. Зардап шеккен үйлерді жөндеуге 4,3 млрд теңге бағытталды, 42,3 млрд теңгеге 2015 пәтер сатып алынды және 775 жаңа тұрғын үй салынды.
Құрылыс жұмыстарына 60-тан астам жергілікті компания мен 2 мыңға жуық адам жұмылдырылды. Сонымен қатар Сырым ауданында алдында жүргізілген техникалық тексеру нәтижесінде жөндеуге жатқызылған бірқатар тұрғын үйлерде уақыт өте келе іргетастары шөгіп, қабырғаларында жарықтар пайда болды.
Әкім тұрғындардың өтініштері негізінде қайта техникалық тексеру жүргізіліп, тағы 38 жаңа тұрғын үй салу туралы шешім қабылданғанын хабарлады.
Құрылыс жұмыстары 3 қыркүйекте басталды және биылғы 15 қазанға дейін аяқталады. Бұдан бөлек, Орал қаласында қайталама нарықта пәтер сатып алу бойынша жұмыстарды ұйымдастыру барысында көпбалалы отбасылардан жеке тұрғын үйлер салу бойынша өтініштер келіп түсті. Осыған байланысты, қысқа мерзімде Орал қаласының Деркөл кентінде 28 қосымша тұрғын үйдің құрылысы басталды. Құрылыс жұмыстары осы жылдың 1 қазанына дейін аяқталады.
Жалпы, облыс бойынша су тасқыны салдарын қалпына келтіруге барлық көздерден 100 млрд теңге бағытталды.