Батыс Қазақстан облысының Шыңғырлау ауданында мектеп оқушысына қатысты қылмыстық іс бойынша күдікке ілінген азамат жоғары лауазымды тұлға болуы мүмкін, – деп хабарлайды aqshamnews.kz тілшісі «Уральская неделя» басылымына сілтеме жасап.
Мәліметке сәйкес, күдіктінің аты-жөні ресми түрде жарияланбаған. Оқиғаға бір айдан астам уақыт өтсе де, күдікті қамауға алынбағаны жөнінде жәбірленуші тарап мәлімдеді. Қыздың әкесі жергілікті басылымға берген сұхбатында, 2 қаңтар күні 57 жастағы ер адам қызын алдап үйіне шақырып, қылмыс жасағанын айтты. Оның сөзінше, полицияға арыз түскеннен кейін күдікті ұсталып, жауап алынғанымен, кейін босатылған.
Әкесі күдіктінің бөлімшеде кінәсін мойындағанын және қыздың оны танығанын айтып, алайда ер адам үйіне жіберілген соң өзіне қоқан-лоқы көрсете бастағанын жеткізді. Сонымен қатар ол құқық қорғау органдары бұл іске жеткілікті деңгейде мән бермей отыр деп алаңдаушылық білдірген.
Бұған дейін БҚО полиция департаменті аталған дерекке қатысты түсініктеме беріп, Қылмыстық кодекстің 120-бабы 3-1-бөлігінің 1-тармағы бойынша іс қозғалғанын хабарлаған. Ведомствоның мәліметінше, күдіктіге қатысты “қамауда ұстау” бұлтартпау шарасын қолдану мәселесі тергеу әрекеттері кешені жүргізілгеннен кейін шешіледі.