Қазақ қоғамында мынадай пікір қалыптасқан: біздің балаларымыз мектеп бітіргеннен кейін міндетті түрде жоғары оқу орнына түсу керек, диплом алу керек, содан кейін қызметке тұрып жұмыс істеу керек деген түсінік бар. Ал енді...
Күнделікті өмірде не көріп жүрміз? Кішкентай бір нәрсе бұзылып қалса немесе қарапайым кәріз жүйесі бітеліп қалса, біз маман шақырамыз. Олар келеді де 5 минуттық жұмысын істеп, біздің жарты айлық жалақымызды алып кетеді. Осы жерде бізде кемшілік бар.
Мысалы, ауылдық жерде қазір механизатор деген мамандық таппайсыз. Ол жерде токарь, дәнекерлеуші мамандары жетіспейді. Егер қазір ауылдағы техниканың бір жері бұзылып қалса, бәрін қалаға тасып жөндейді.
Сондықтан бұл жолдауда жақсы айтылды: біз маман дайындауымыз керек. Нағыз қажетті күнделікті тіршілікке қажет мамандарды даярламасақ, ауыл шаруашылығы саласы тұралап қалады.
Мен президенттің мамандарды даярлау және еңбек адамының мәртебесін арттыру жайында айтқан әңгімелерін толық қолдаймын.