Президенттің бастамасы
Алматы балабақшаларында тәрбиешілер 100-120 мың теңге көлемінде айлық алады. Бұл өте аз. Осыған орай, Президент Жолдауында балабақшала тәрбиешілерінің жалақысын көтеру туралы айтқаны олардың жұмысына үлкен серпін бермек. Бұл туралы Алматы қаласы мәслихатының депутаты Арайлым Шамова айтты, деп хабарлайды Almaty-akshamy.kz ҚазАқпарат-қа сілтеме жасап.
«Бүгін Президент Қасым-Жомарт Тоқаев «Әділетті мемлекет. Біртұтас Ұлт. Берекелі қоғам» атты Жолдауында бес бағдарды атап өтті. Өзім білім саласының маманы болған соң, әуелі білім саласына тоқталмақпын. Президент Жолдауда балабақша тәрбиешілерінінің жалақысын көтеру туралы айтты. Расында, қазіргі таңда балабақша тәрбиешілерінің еңбекақылары төмен. Алматыда тәрбиешілер 100-120 мың теңге көлемінде жалақы алып жүр. Президенттің бастамасы олардың жұмыстарына үлкен серпін береді деп айта аламын», - деді спикер.
Сондай-ақ ол Алматы мектептерінде оқушының орын тапшылығын атап өтті.
«Биыл Алматыда 1 сыныпқа жоспардан бөлек, 2 мың бала артық келді. Егер Президент Жолдауында айтқандай, «Жайлы мектеп» жобасы аясында 2025 жылға дейін 800 мың балаға арналған мектеп салынар болса, бұл мәселенің шешімі табылады деп ойлаймын. Сонымен бірге, қазір «жаңадан ашылатын осы мектептер қай тілде оқытады» деген сұрақтар қойылуда. Оған Мемлекет басшысы нақты жауап берді, яғни, «сұраныс қай тлдіе болса, мектеп сол тілде ашылады», - деді депутат.
Арайлым Шамова 18 жасқа дейінгі балаларға әлеуметтік шоттың ашылуын Жолдаудағы өте құптарлық жағдай екенін атап өтті.
«Бұл жерде Ұлттық қордың инвестициялық табысынан ақша түсіп отырады және бұл ақшаны бала 18 жасқа толмай шоттан шешіп ала алмайды. Бала 18 жасқа толғаннан соң, шотындағы қаражат өзінің оқуына немесе үй алуына үлкен көмек болмақ», - деді спикер.