Оқушының ата-анасын жауапкершілікке тарту үшін әкімшілік іс қозғалды
Кеше желіде жоғары сынып оқуышсының мұғалімге дауыс көтеріп, оны балағаттап жатқан сәтінің видеосы тараған еді. Білім және ғылым министрлігі аталған келеңсіз жайтқа қатысты бүгін түсінік берді, деп хабарлайды Almaty-akshamy.kz.
Министрліктің мәліметінше, мұғалім мен оқушы арасындағы жанжал Алматы облысы Талдықорған қаласындағы №4 мектепте болған.
«11 наурыз күні биология сабағында 2005 жылы туған оқушы мұғаліммен қатты дауыспен балағат сөздер айтып сөйлескен. Мұғалім Талдықорған қаласының полиция бөліміне арыз жазған. Қазіргі таңда оқушыға қатысты ҚР ӘҚБтК-нің 434-бабының 1-бөлігі (ұсақ бұзақылық) бойынша әкімшілік хаттама толтырылды. Шешімді Алматы облысының кәмелетке толмағандардың істері жөніндегі мамандандырылған ауданаралық соты қабылдайды.
Естеріңізге сала кетейік, кәмелетке толмаған балалардың іс-әрекеттері үшін ата-аналардың жауапкершілігі қарастырылған»,-делінген хабарламада.
Осы іске байланысты оқушының ата-анасын жауапкершілікке тарту үшін әкімшілік іс қозғалды. Сонымен қатар белгіленген тәртіппен оқушыны есепке қою және оған психологиялық көмек көрсету туралы мәселе де қаралады.
«Айта кетейік, мұғалімдерге деген мұндай көзқарасқа жол берілмейді. Тек мұғалімдер ғана емес, ата-аналар да балалармен қоғамда өзін қалай ұстау керегі туралы әңгімелер жүргізуі маңызды»,-делінген хабарламада.