Абай облысының Бестерек ауылында тамыз айында болған қайғылы жол апатынан кейін комада жатқан 9 жастағы Айзере Дәулет қайтыс болды, деп хабарлайды Аqshamnews.kz тілшісі. Бұл туралы облыстық денсаулық сақтау басқармасы мәлімдеді.
Ведомствоның хабарлауынша, қыз бала шамамен бір айға жуық уақыт ес-түссіз жатқан.
"26 қыркүйек сағат 15:30-да Айзере Даулетке биологиялық өлім диагнозы қойылды. Қыздың жерлеу рәсімі 29 қыркүйекте өтті. Ата-анасының өтініші бойынша басқа ақпарат жарияланбайды", – делінген басқарма таратқан мәліметте.
Бестеректегі жол апаты туралы не белгілі?
19 тамызда Бестерек ауылында Toyota көлігінің 55 жастағы жүргізушісі үйдің қақпасы жанында, жолдан 10 метр қашықтықта тұрған балаларды қағып кеткен. Оқиға орнында екі бала, тағы бірі ауруханаға бара жатқан жолда көз жұмған. Үш бала түрлі жарақатпен ауруханаға жеткізілген.
Қаза болған балалардың жасы 2-ден 7 жасқа дейін, жарақат алғандар 6 мен 9 жас аралығында болған.
Жол апатынан кейін Президент Қасым-Жомарт Тоқаев зардап шеккен балаларға көмек көрсету үшін дәрігерлер отырған арнайы ұшақ жіберуді тапсырған. Арнайы борт Үржар ауданына барып, екі баланы санитарлық авиация арқылы Астанаға жеткізді.
Жарақат алған 6 жасар ұл бала ауыр жарақаттан кейін реанимациядан жалпы палатаға ауыстырылған. Ал 9 жастағы Айзере Дәулет Абай облысының ауруханасында ауыр халде жансақтау бөлімінде жатқан еді.
Абай облысының әкімі Берік Уәли қаза тапқан балалардың отбасына барлық қажетті көмек көрсетуді тапсырды.
Полицияның мәліметінше, көлік жүргізушісі ұсталып, уақытша ұстау изоляторына қамалған. Сараптама оның оқиға кезінде мас болмағанын көрсетті. Қылмыстық іс қозғалды.
