Бүгін, 23 шілдеде Алматы жұрты белгілі журналист Мұхтар Түменбайды ақтық сапарға шығарып салды, деп хабарлайды аqshamnews.kz тілшісі.
Астанада басталған Мұхтар Түменбаймен қоштасу рәсімі Алматыда жалғасты. 22 шілдеде өткен қонақасында Мемлекеттік кеңесші Ерлан Қарин, Президенттің кеңесшісі Бауыржан Омаров бастаған зиялы қауым өкілдері, жазушылар, БАҚ басшылары сөз сөйлеп, Мұхтар Жақсылықұлының қысқа ғұмырда атқарған істерін, азаматтық белсенділігін атап өтті.
Бүгін, 23 шілдеде Алматының Бас мешітінде марқұмның жаназасы оқылып, Кеңсай-2 зиратына жерленді.
Жаназадан кейін берілген асқа Мұхтар Түменбай дүниеге келген Қызылорда облысынан арнайы делегация келді. Облыс әкімінің, Арал ауданының, Сазды ауылынан көңіл айтылды. Сондай-ақ, саясаткер Қуаныш Сұлтанов, Жазушылар Одағының төрағасы Мереке Құлкенов пен әріптестері марқұм жайлы естеліктерін бөлісіп, Абай облысының әкімі Берік Уәли мен Алматы қаласының әкімі Дархан Сатыбалдының туған-туысқандарына көңіл айту хаты оқылды.
Еске салайық, 21 шілдеде белгілі журналист Мұхтар Түменбайдың 55 жасқа қараған шағында жүректен қайтыс болғаны хабарланған болатын. Ол - белгілі жазушы Жақсылық Түменбаевтың ұлы. Әл-Фараби атындағы Қазақ ұлттық университетінде білім алған. Еңбек жолында бірқатар басылым мен республикалық телеарналарда қызмет атқарған. «Qazaqstan» телеарнасындағы «Апта» ақпараттық-сараптамалық бағдарламасының жүргізушісі ретінде көрерменге кеңінен танылды. Сондай-ақ ол - «Мәншүк. Әкеге араша түскен қыз», «Төрт қайсар», «Әлия. Ерлік алгоритмі» сынды соғыс қаһармандарына арналған деректі фильмдердің авторы еді. Ұлттық мүддені жоғары қоятын журналист ретінде қоғамдағы көптеген өзекті мәселелерді өткір көтеріп, жұртшылық ілтипатына бөленіп жүретін.