Карантин шаралары бәсеңдейді
Қыркүйектен бастап Бельгияда карантиндік шаралар күшін жоймақ, деп хабарлайды Almaty-akshamy.kz «Хабар 24» сайтына сілтеме жасап.
Статистика бойынша, әр 10 бельгиялық азаматтың 8-і екпе салдырған. Бұған бұл елдегі екпе салу науқанының бір ізге қойылуы себеп. Бұл туралы осы елдің Премьер-Министрі хабарлады. Енді мейрамханалардағы адам саны шектелмейді. Қоғамдық тамақтану орындарының барлығы түнгі сағат 1-ге дейін жұмыс істеу мүмкіндігіне ие. Тек ел астанасындағы ахуал әзірше оңалмағандықтан, ондағы карантин талаптары әлі де күшінде болады. Осыған орай шаһарда халық көп шоғырланатын орындар мен көліктерде маска тағу режимі сақталмақ. Жергілікті билік тұрындарды вакцина салдыруға шақырады. Айта кетейік, қазір Бельгияда екпе салу науқаны ерікті түрде жүруде. Тек медицина қызметкерлері мен қарттар үйіндегілер міндетті түрде егілуі тиіс.
«Медицина қызметкерлері халықтың денсаулығына жауапкершілікпен қарау керек. Бельгияда әлі күнге дейін вирус жұқтырған науқастар аз да болса тіркеліп жатыр. Бұл жағдай біраз уақыт сақталмақ. Өйткені халық демалыстан орала бастады, оқу жылының басталуына да аз қалды. Десе де, вакцинаның әсері болар, өлім-жітім мен ауруханаға түскендердің саны азаюда», - деді Белгияның Премьер-Министрі Александр де Кро.