Маңғыстау облысының Бейнеу ауылында екі бала жабайы жануар шабуылынан жеңіл жарақат алды. Бұл туралы өңірлік денсаулық сақтау басқармасы мәлімдеді, - деп хабарлайды Aqshamnews.kz.
21 қарашада орталық аудандық аурухананың травмпунктіне ата-аналарымен бірге екі бала жүгінген. Медициналық деректерге сәйкес, мектеп оқушыларына қарсақ (дала түлкісі) деп көрсетілген жануар шабуыл жасаған.
2011 жылы туған жасөспірімнің оң аяқ сирағынан, ал 2018 жылғы баланың сол аяғынан жара анықталған. Дәрігерлер оларға қажетті вакциналарды енгізген. Қазіргі уақытта балалардың жағдайы қанағаттанарлық, олар амбулаторлық бақылауда.
Аймақтық экологиялық кеңес төрағасы Әділбек Қозыбақов жануардың суретін зерттей келе, оның қарсақтан гөрі кәдімгі түлкіге көбірек ұқсайтынын атап өтті. Оның айтуынша, жабайы аңдар құтыру вирусын тасымалдауы мүмкін, сондықтан олардан сақ болу қажет.
Маман мұндай жағдай болғанда бірден тиісті қызметтерге хабарлап, кез келген жарақат кезінде дереу медицина қызметкерлеріне жүгіну керегін ескертті.