Президент Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы ел дамуының алдағы бағытын айқындап, білім мен ғылымды дамытуға, экономиканы нығайтуға және халықтың тұрмыс сапасын арттыруға басымдық берді. Алматы қаласы Саяси қуғын-сүргін құрбандары қауымдастығының төрағасы, ҚР Мәдениет қайраткері, филология ғылымдарының кандидаты, әл Фараби атындағы ҚазҰУ-дің ассистент профессоры Бауыржан Иманғалиев Жолдауда көтерілген бастамаларға қатысты пікір білдірді, – деп хабарлайды aqshamnews.kz тілшісі.
Оның айтуынша, Мемлекет басшысы айқындаған міндеттердің ішінде білім беру жүйесін жетілдіру, ғылымды қолдау және жас ұрпақтың зияткерлік әлеуетін арттыру мәселелері айрықша мәнге ие.
Бауыржан Иманғалиев
«Қазір бой жарыстыратын емес, ой мен білім жарыстыратын заман. Біз келешек ұрпаққа білімі мен ғылымы дамыған, өркениетті, тәуелсіз Қазақстанды аманат етуіміз керек. Ол үшін білімді, жаңаша ойлайтын, отаншыл жастарды тәрбиелеу қажет. Бұл – еліміздің жарқын болашағы мен өркендеуінің басты кепілі», – деп атап өтті Бауыржан Иманғалиев.
Сарапшы Президенттің білім, ғылым және инновацияны өзара ұштастыру, оқу үдерісіне жасанды интеллект пен цифрлық технологияларды енгізу жөніндегі бастамаларын уақыт талабына сай шешім деп бағалады. Оның пікірінше, жоғары оқу орындарының ғылыми әлеуетін арттыру, ғалымдар мен білімге ұмтылған жастарға қолдау көрсету елдің бәсекеге қабілеттілігін күшейтеді.
Сонымен қатар, Жолдауда педагогтердің мәртебесін қорғау мәселесіне ерекше назар аударылды. Мемлекет басшысы мұғалімдерді артық есептілік пен қағазбастылықтан босату, олардың негізгі міндеті – сапалы білім беруге жағдай жасау қажеттігін айтты. Мектептерде ұстаздарға тіл тигізу және күш көрсету жағдайларының алдын алу да маңызды міндет ретінде белгіленді.
Бауыржан Иманғалиев елдің ұзақмерзімді дамуы үшін инфрақұрылымды жаңғыртуға бағытталған бастамалардың да маңызы зор екенін жеткізді.
Жолдауға сәйкес, 2029 жылдың соңына дейін ауқымды инфрақұрылымдық жобаларды жүзеге асыру үшін Ұлттық қордан шамамен 6,5 триллион теңге бөлінбек. Бұған қоса, әлеуметтік жобаларды жедел іске қосу мақсатында 1,5 триллион теңге қарастыру көзделген. Бұл қаражат тұрғын үй, жол, әлеуметтік нысандар мен инженерлік желілерді дамытуға бағытталады.
Сондай-ақ, Президент салық саясатын жетілдіру, кәсіпкерлерге түсетін артық жүктемені азайту және заңнамадағы қайшылықтарды жою міндеттерін көтерді. Экономиканың тұрақтылығын қамтамасыз ету, өңдеу өнеркәсібін дамыту және Қазақстанның Еуразиядағы көлік-логистикалық әлеуетін күшейту де стратегиялық басымдықтар қатарында.
Бауыржан Иманғалиевтің пікірінше, Жолдаудың негізгі мәні тек экономикалық көрсеткіштер мен ауқымды жобаларда емес, болашақ ұрпақ алдындағы жауапкершілікте жатыр.
«Мемлекет басшысы келер ұрпаққа қаржылық байлықпен қатар, заң үстемдігі орныққан, ғылымы мен технологиясы дамыған қуатты мемлекет қалдыру қажеттігін атап өтті. Бұл мақсатқа жету үшін әр азамат ел дамуына өз үлесін қосып, білімге, адал еңбекке және қоғамдық жауапкершілікке басымдық беруі тиіс», – деп түйіндеді ол.
Осылайша, сарапшы Президент Жолдауында белгіленген міндеттерді Қазақстанның жаңа тарихи кезеңдегі дамуына негіз болатын маңызды бастамалар ретінде бағалады.