Депутат Ринат Зайыт анимациялық фильмдерге бөлінген қаражат өзін ақтамай отырғанын айтып сынады, - деп хабарлайды Аqshamnews.kz тілшісі.
Мәжіліс отырысында депутат Ринат Зайыт мәдениет және ақпарат министрі Аида Балаеваға анимациялық фильмдерге қатысты сауал жолдады.
"Біздің батырларымыз бен хандарымызды насихаттайтын бірде-бір мультфильм бар ма?! Мен әлі күнге дейін көрген жоқпын. Ауылда бір ауыз орысша білмейтін ата-ананың баласы қайдан орысша сайрап жүр деп ренжейміз. Өйткені бүкіл анимациялық фильмдер сол тілде. Қазақстанда 5 жылда 1,4 миллиард теңгеге Қазақфильм 47 анимациялық фильм жасады деген есеп бар. Мұндай қаржыландырудан кейін серпіліс болуы керек еді ғой. Болған жоқ! 47 фильмнің 4-еуі ғана телеарналардан көрсетілді, қалғана ешқайда шыққан жоқ. Неге анимацияға бөлінген ақшаға ілгерілеу жоқ?" - деді ол.
Аида Балаева, алғаш кезде өнім болмағанын, кейін 47 өнімді көпшілікке көрсету үшін құқықтық негіздің болмағанын айтты.
"Өйткені ең басты халықаралық шарт бойынша мұндай өнімдер әртүрлі деңгейдегі халықаралық фестивальдің шеңберіндегі байқаулардан өтуі керек. Бұл жұмыс жүргізіліп жатыр. Барлық фестивальде жартысы өтті, қалғаны қатысып жатыр. Туындыларды цифрлық маркетинг, арнайы стриминг платформа арқылы тарату жүйесі болған жоқ. Оны біз былтыр қолға алдық. Қазір жаңа өнімдер 25-і "Қазақстан" телеканалында, 69-ы "Хабар" телеканалында орнатылды. YouTube-те "Қазақфильм" әртүрлі жылда түсірген 10 өнім орналастырылды. Бұдан бөлек, түрлі оқу орындарында көрсетуді қолға алып жатырмыз", - деп жауап берді ол.
Премьер-министрдің орынбасары Ермек Көшербаев Ринат Зайыттың сынын орынды деп атады.