Жақынынан айырылған адам үшін мұрагерлік мәселесін рәсімдеу оңай емес. Дегенмен заңда белгіленген мерзімдерді өткізіп алмау маңызды. Мамандардың айтуынша, азаматтардың көбі мұраны қабылдау тәртібін білмегендіктен кейін түрлі қиындықтарға тап болады.
Ең маңызды мерзім – 6 ай
Қазақстан заңнамасына сәйкес, мұра мұра қалдырушы қайтыс болған күннен бастап ашылады. Сол күннен бастап мұрагерлер нотариусқа жүгініп, өз құқықтарын рәсімдеу үшін 6 ай уақытқа ие. Егер бұл мерзім өтіп кетсе, оны қалпына келтіру үшін сотқа жүгінуге тура келеді.
Қайда жүгіну керек?
Мұрагерлік іс мұра қалдырушының соңғы тұрғылықты жері бойынша нотариуста ашылады. Нотариус мұрагерлік істі жүргізіп, өсиеттің бар-жоғын тексереді және қажетті құжаттарды қабылдайды.
Қандай құжаттар қажет?
Әдетте нотариусқа мынадай құжаттар ұсынылады:
- жеке куәлік;
- қайтыс болу туралы куәлік;
- туыстық қатынасты растайтын құжаттар;
- марқұмның соңғы тұрғылықты жері туралы мәлімет;
- мұраға қалдырылған мүлікке қатысты құжаттар.
Қажет болған жағдайда нотариус қосымша құжаттар сұратуы мүмкін.
Мұра қалай бөлінеді?
Егер өсиет болса, мүлік марқұмның еркіне сәйкес бөлінеді. Ал өсиет болмаған жағдайда мұра заң бойынша бөлінеді. Бірінші кезекте жұбайы, балалары және ата-анасы мұрагер болып саналады.
Соңғы қадам
Алты айлық мерзім аяқталғаннан кейін нотариус мұрагерлік құқық туралы куәлік береді. Осы құжаттың негізінде пәтер, жер учаскесі немесе өзге де мүлік мұрагердің атына рәсімделеді. (Государственные услуги)
Заңгерлердің айтуынша, мұрагерлік мәселесін кейінге қалдырмай, құжаттарды уақытында рәсімдеу туыстар арасындағы даулардың алдын алып, мүлікті заңды түрде иеленуге мүмкіндік береді. (Egemen Qazaqstan)