22 мамырда Алматы қаласындағы №58 жалпы білім беретін мектепте "Әкем – тірегім, анам – жүрегім" флешмобы ұйымдастырылды, - деп хабарлайды aqshamnews.kz тілшісі.
Іс-шара "Бақытты бала – бақытты отбасы" тақырыбында, Қазақстан балалары тұжырымдамасы аясында және 1 маусым – Халықаралық балаларды қорғау күні қарсаңында өткізілді.
Флешмобтың басты ерекшелігі – оқушылардың аналары бірге қатысып, көңілді әрі тартымды қимылдар арқылы өзара байланыс пен сүйіспеншілікті бейнеледі. Бұл бір сәт көңіл көтеру емес, ана мен бала арасындағы жылы қарым-қатынасты нығайтатын, бір-біріне жақындай түсуге мүмкіндік беретін әсерлі көрініс болды.
Флешмоб барысында аналар мен балалар бірігіп қимыл жасап, бір-бірінің көңіл-күйін сезіне білді. Жүздеріндегі шаттық, көздеріндегі шынайы қуаныш көп нәрсені аңғартты. Бұл – отбасындағы махаббат пен түсіністіктің, жылылық пен мейірімділіктің нақты дәлелі.
"Тәрбие отбасынан басталады. Баланың ата-анасымен жақын қарым-қатынасы – берік отбасының ғана емес, тұтас қоғамның мықты іргетасы. Біз балалардың бақытты болғанын, олардың жүзінен күлкі кетпегенін қалаймыз. Себебі болашақ – осы балалардың қолында, ал біз сол болашақпен бірге бақыттымыз", - деді №58 мектеп директоры Шынар Утжанова .
Осы мазмұнды іс-шара арқылы мектеп ұжымы тек мерекелік көңіл-күй емес, отбасылық құндылықтарды насихаттаудың да жарқын үлгісін көрсетті.
