Қаржы сарапшысы Бақытжан Сәркеев Мемлекет басшысы Қасым-Жомарт Тоқаевтың төрағалығымен өткен Үкіметтің кеңейтілген отырысында айтылған тапсырмаларды жоғары бағалады. Сарапшының пікірінше, халықтың әлеуметтік жағдайын жақсарту бірінші кезектегі міндет болып қала береді.
Екінші деңгейлі банктердің жауапкершілігі:
– «Бір кездері екінші деңгейлі банктерге мол қаражат берілді. Олар мемлекет есебінен күн көрді десек, артық емес. Енді олардың халық игілігі үшін жұмыс істейтін кезі келді. Егер банктер шаруашылық субъектілеріне нақты қолдау көрсетіп, төмен пайызбен несие берсе, көптеген әлеуметтік және экономикалық мәселе өздігінен шешіледі», – деді Сәркеев.
Доллар бағамын тұрақтандыру жолдары:
Сарапшы доллар бағамының 500 теңгеден асып кетуін шешудің тиімді жолын – экономиканы әртараптандыруды ұсынады.
– «Өндіріс орындарын, зауыттар мен фабрикаларды көбейту арқылы біз экономикалық тұрақтылыққа қол жеткіземіз. Еліміз мұнай, газ, уран, көмір, темір, мыс және мырыш сияқты ресурстарға бай. Бірақ оларды шикізат күйінде емес, терең өңдеп, шетелге экспорттау қажет. Бұл ұлттық экономиканы нығайтып, теңге бағамын тұрақтандыруға ықпал етеді», – деді ол.
Жасайтын істі кейінге қалдырмау:
Сәркеевтің пікірінше, Қазақстанның әлеуметтік-экономикалық мәселелерін шешу үшін әрекет ету уақыты – дәл қазір.
– «Бірлесіп атқаратын жақсы істерді ертеңге қалдырмай, бүгіннен бастаған жөн. Халықтың әл-ауқатын жақсартуға бағытталған әрбір бастама маңызды», – деді сарапшы.