Ақтөбеде қалалық және облыстық балалар ауруханалары дұрыс ем көрсетпегені үшін науқас баланың отбасына 10 миллион теңге моральдық өтемақы төлейтін болды, деп хабарлайды Aqshamnews.kz тілшісі "Диапазон"-ға сілтеме жасап.
Оқиға 2023 жылы болған. Төрт жасар қыз балаға бір жеке клиникада "іріңді отит" диагнозы қойылса, екіншісінде "сол жақ бет жүйкесінің невралгиясы" деген қорытынды жасалған. Кейін ол қалалық балалар ауруханасына жіберіліп, дәрігерлер іріңді отит кезінде жасауға болмайтын физиоем тағайындаған. Осыдан соң баланың жағдайы нашарлай түскен.
Кейінгі ем облыстық балалар ауруханасында жалғасқанымен, қыз бала ұзақ уақыт антибиотиксіз қалып, тек таңу жұмыстары ғана жүргізілгені айтылады. Дәрігерлер консилиумнан кейін емдеу тактикасын анықтағанымен, жақсарудың белгісі болмаған. Ақыры анасы баласын өз бетімен Алматыдағы "Ақcай" республикалық ауруханасына апарып, емін сонда жалғастырған.
Баланың анасы Ақтөбедегі қалалық және облыстық балалар ауруханаларын дұрыс медициналық көмек көрсетпеді деп сотқа беріп, моральдық зиянды өтеуді талап еткен. Сараптама қорытындысына сәйкес, емнің уақытында көрсетілмеуі ортаңғы құлақ инфекциясына, басішілік асқынуларға әкеліп, нәтижесінде балаға бас сүйегіне резекциялық трепанация жасалған.
Қазір баланың бір құлағы мүлде естімейді, екінші құлағында тұрақты шу бар. Дәрігерлер оған I дәрежелі есту қабілетінің жоғалуы диагнозын қойған.
Сот шешімі бойынша, алдымен ювеналды сот екі аурухананы да 5 миллион теңгеден төлеуге міндеттеген. Апелляциядан кейін сот алқасы бұл шешімді күшінде қалдырып, екі медициналық ұйымның да біліксіз көмегі баланың жағдайын ушықтырғанын атап өтті. Нәтижесінде ауруханалар жалпы сомасы 10 миллион теңге өтемақы төлейді.
