Қаржылық мониторинг агенттігінің Астана қалалық департаменті баласының еміне деп елден ақша жинаған ерлі-зайыптыларға қатысты алаяқтық фактісі бойынша тергеуді аяқтады, деп хабарлайды Аqshamnews.kz.
Желідегі жалған жарнама
Тергеу нәтижелеріне сәйкес, ерлі-зайыптылар баласының видеоларын, эмоциялық жазбаларды және Instagram мен Facebook желілері арқылы агрессивті мақсатты жарнаманы пайдаланып, мыңдаған қазақстандықтардың жүрегін жібіткен. Олар азаматтардың сеніміне кіріп, бас-аяғы 1,3 миллиард теңгеден астам қайырымдылық қаражатын жинаған. Алайда, бұл қаржының тек 6,4 миллион теңгесі ғана баланың еміне жұмсалған. Қалған ақша олардың жеке мақсаттарына жұмсалғған.
Агенттіктің мәліметінше, күдіктілер Астанадан үш пәтер, жер телімі және бес автокөлік сатып алған. Сонымен қатар, жиналған ақшаның бір бөлігін букмекерлік кеңсеге бәс тігуге пайдаланған.
Жиналған қаражат көлемін арттыру үшін ерлі-зайыптылар оның үштен бірін Meta Ads арқылы жарнамаға салған. Бұл олардың парақшаларының әлеуметтік желідегі ауқымын айтарлықтай кеңейтіп, қолданушылардан көбірек ақша аудартуға мүмкіндік берді.
Шетелде емделуді қолдан ұйымдастырған
Қаражат жинауға себептердің бірі – Түркиядағы LIV Hospital клиникасында 84 миллион теңге тұратын операцияның қажеттілігі туралы мәлімдеме болған. Алайда бұл сома жиналғанымен, шетелге сапар мүлде жүзеге аспаған.
Күдіктілер шетелге ұшқандай көріну үшін Instagram парақшаларында әуежайдан түсірілген бейнероликтерді жариялап, кейін "сәтті операция" туралы жалған жазба салған.
Мүлікті жасыру әрекеті
Алдын ала тергеу басталғаннан кейін, күдіктілер активтерді жасыруға тырысқан – жер телімін үшінші тұлғаға рәсімдеген. Бірақ тергеу барысында бұл мәміленің жалған екені анықталды.
Соттың санкциясымен қылмыстық жолмен алынған қаражатқа сатып алынған барлық мүлікке тыйым салынды. Қазіргі уақытта күдіктілер үйқамақта. Қылмыстық іс сотта қаралып жатыр.