Осыдан бір жарым жыл бұрын «Байтақ» жасылдар партиясы төрағасы Азаматхан Сайлауұлының тікелей тапсырмасымен ғылыми-сараптамалық жұмыс тобы құрылып, әлемдегі ең озық әрі тиімді атом электр станцияларын зерттеу жұмыстарын бастаған еді. Топтың негізгі міндеті – АЭС-тің экологиялық қауіпсіздігі мен еліміздің энергетикалық тәуелсіздігін қамтамасыз ететін реакторлар мен басқару технологияларына ғылыми тұрғыда баға беру болды.
Енді осы зерттеулердің нәтижелерін халыққа егжей-тегжейлі жеткізетін күн де келді. 6 қазан күні өтетін референдумның тақырыбы да ерекше маңызға ие. Халық болып осы маңызды шешімді қабылдау арқылы болашағымыздың жарқын болуы үшін жауапкершілікті тең бөлісетін уақыт жетті.
Сыр өңіріне келген Республикалық халықтық штабтың өкілдері, ҚР Парламенті Мәжілісінің депутаты Мархаббат Жайымбетұлы, «Байтақ» партиясының Атқарушы хатшысы Нұрлан Болатұлы және өңірдің бір топ азаматтары Жаңақорған ауданының жастары және еңбек ұжымдарымен кездесті. Сонымен қатар, ауданның оңалту орталығы, уран тасымалдаушы Жаңақорған транзиті, Алма бағы шаруашылықтары және Жан-Арай шипажайы секілді ауданның маңызды нысандарында болды.
Ауданның негізгі кәсіпкерлері мен еңбек ұжымдарының қызметкерлері алдағы референдумда АЭС салуды бірауыздан қолдайтындарын жеткізді. Олар бұл шешімді еліміздің дамуына қажетті әрі уақытылы қабылданған маңызды саяси қадам ретінде қабылдап отыр.