Әзірбайжан Министрлер кабинеті Ресей азаматтарының ел аумағында болу тәртібіне өзгерістер енгізді. Жаңартылған ережелер үкіметтің ресми сайтында жарияланып, 2025 жылғы 1 қаңтардан бастап күшіне енеді, деп хабарлайды aqshamnews.kz
«Әзірбайжан Республикасына визасыз келген Ресей азаматтары мен Ресей Федерациясында тұрақты тұратын азаматтығы жоқ тұлғалардың уақытша тұру мерзімі бір күнтізбелік жыл ішінде 90 күннен аспауы тиіс», – делінген құжатта.
Құжатқа елдің премьер-министрі Али Асадов қол қойған.
Бұл өзгерістер Ресей тарапынан бұрын енгізілген ұқсас өзгерістерге жауап ретінде қабылданды. 26 желтоқсанда Ресейдің Сыртқы істер министрлігінің сайтында шетел азаматтарының елде уақытша тұру мерзімін жылына 90 күнге дейін қысқарту туралы хабарлама жарияланған болатын.
Әзірбайжанның Сыртқы істер министрлігі елдің көші-қон саясатында өзара және теңдік қағидаттарын ұстанатынын, осы негізде жаңа ережелер қабылданғанын мәлімдеді.