Бетперде киген қайырымды жан тағы бір мұқтаж отбасыға көмек қолын созды. Бұл жолы ол сирек дертке шалдыққан 15 жастағы Ақнұрға қолдау көрсеткен, – деп хабарлайды aqshamnews.kz тілшісі.
Ақнұр таран сүйегінің дисплазиясы диагнозымен ауырады. Қазақстандық дәрігерлер оған нақты көмек көрсете алмаған. Отбасының әлеуметтік жағдайы да ауыр: анасы тапсырыспен тәтті пісірсе, ағасы шиномонтажда және жүк тасушы болып еңбек етеді. Өздері жалдамалы пәтерде тұрып келген.
Желіде тараған видеода Ақнұр өзінің 2-топтағы мүгедек екенін айтып, аяғынан айырылып қалуы мүмкін екенін жеткізген. Дәрігерлер оған шетелде ем қабылдау қажет екенін айтқан. Қыздың ең үлкен арманы – аяғына тұрып, мектепке барып, қатарластарымен бірге оқу.
Осы үндеуге «Бетпердедегі адам» атымен танылған қайырымды жан жауап берді. Ол Ақнұрға емделу мен оқуына қажетті қаражат салынған конверт табыстап, отбасына жеке пәтер сыйлаған.
Қазір Ақнұр анасы және ағасымен бірге Түркияда ем қабылдап жатыр. Қайырымды жанның айтуынша, қыздан онкология белгілері де анықталған. Сондықтан алда оны күрделі ем күтіп тұр.