Әуезов ауданы комьюнити-орталығы мен демалыс орталықтарының «AUEZOV AWARDS» атты жылдық қорытынды концерті өтті.
Бұл кеш – бір жыл ішінде атқарылған игі істердің, тың бастамалар мен әлеуметтік жобалардың, жастардың шығармашылығы мен белсенділігінің қорытындысы. Комьюнити-орталық пен демалыс орталықтары жүзеге асырған жобалардың нәтижесі мен жастардың табысты еңбектері сахна төрінде көрініс тапты.
– Алматының әр ауданында кем дегенде 2 комьюнити-орталықтан бар. Бұл орталықтар жастардың жан-жақты қырларын ашуға, бойларындағы мүмкіндікті пайдалануға ерекше шабыт сыйлайды. Біздің шығармашылық бағыттағы орта жастарды әлеуметтендіру мен қоғамда өздерін дамытуға көмектеседі. «AUEZOV AWARDS» – дарынды, шығармашыл, креативті жастардың басын біріктірген бірегей алаң, – деді Әуезов ауданы комьюнити-орталығының жетекшісі Бауыржан Махамбет.
Шараның мақсаты – ауданның креативті, белсенді, заманауи жастар қауымын қолдау, олардың еңбегін бағалау және жаңа бастамаларға шабыт беру.
Бағдарлама аясында жыл бойы жүзеге асқан жобалардың таныстырылымы ұсынылып, түрлі аталым бойынша үздік жастар, жетекшілер мен қызметкерлер марапатталды.
Ал комьюнити-орталықтың белсенді қызметкері Қуаныш Утемисов Әуезов ауданы басшылығының тың ұсыныстарды қашан да қолдауға дайын екенін жеткізді.
– Бір жылдың ішінде біз жастарға арналған бірқатар жобаны жүзеге асырдық. Оның ішінде жастардың идеяларын қалалық деңгейге дейін танытатын тренингтер мен семинарлар, шеберлік сабақтар ұйымдастырдық. Нәтижесі жаман емес, – деді қызметкер.