Атырауда өзін "хакер" деп таныстырып, әлеуметтік желіде жоғалған отбасыға қатысты түрлі нұсқалар таратқан ер адам Интерпол арқылы халықаралық іздеуге жарияланды, деп хабарлайды Aqshamnews.kz тілшісі.
Атырау облыстық полиция департаменті аталған азаматтың халықаралық деңгейде іздеуде жүргенін ресми растаған. Құқық қорғау органдары оның алаяқтық бойынша айыпталып отырғанын, алдын ала дерек бойынша шетелде бой тасалап жүргенін хабарлаған.
Полиция не дейді?
Полиция бұған дейін "хакердің" әлеуметтік желіде жариялаған "өз зерттеуіне" қатысты пікір білдіріп, оның қаржылық ағымдар мен басқа да деректер туралы айтқандары шынайылыққа сәйкес келмейтінін мәлімдеген. Сонымен қатар ведомство ресми дереккөздерге ғана сүйенуді сұрап, жалған ақпарат таратқаны үшін заң бойынша жауапкершілік қарастырылғанын ескерткен.
Полицияның ақпаратынша, аталған адамға қатысты бұған дейін алаяқтық фактілері бойынша төрт қылмыстық іс тіркелген, тергеу жалғасып жатыр.
Атыраудағы жағдайдың жай-жапсары
Еске салсақ, 6 қаңтарда Атырау облысының Жангелдин ауылынан 66 жастағы Мақсот Қарабалин мен 64 жастағы жұбайы Насип Үтешқалиеваның мәйіті табылған. Іс бойынша басты күдікті ретінде марқұмдардың 29 жастағы күйеу баласы Сұлтан Сәрсемәлиев аталады. Ол да халықаралық іздеуде. Ал марқұмдардың кенже қызы Ақбаян Мұқанғалиева хабар-ошарсыз кеткендер ретінде халықаралық іздеуге жарияланғаны айтылды.
