Атырауда жоғалған отбасының ұл-қызы да өлі табылды, – деп хабарлайды aqshamnews.kz тілшісі.
Атырау қаласы маңындағы Геолог шағынауданында Наурыз бен Мирамгүлдің мәйіттері табылды.
Кеше күдіктілер Сұлтан мен оның жұбайы Ақбаян Алматыға жеткізілген. Алматыда Сұлтан Сәрсемалиев Наурыз бен Мирамгүлді өлтіргенін мойындап, олардың денесін бұрын өзі тұрған Геолог шағынауданындағы үйдің ауласына көмгенін айтқан.
Осы мәліметтен кейін Атыраудағы тергеушілер көрсетілген жерге барып, аумақты қайта тексерген. Нәтижесінде екі адамның мәйіті табылды.
Марқұмдардың денесі табылған үйде күдікті Сұлтан Сәрсемалиев жұбайымен бірге тұрғаны анықталған.
Жоғалған отбасы мүшелерінің барлығы табылды. Қазір тергеу жұмыстары жалғасып жатыр, ал тергеушілер қылмыстың өзге де мән-жайларын анықтап жатыр.
Еске салайық, іздестіру жұмыстары былтыр желтоқсаннан бері жүргізіліп келген. Оған полиция қызметкерлері мен Ұлттық гвардия сарбаздары қатысып, арнайы жылжымалы штаб құрылған. Үй ауласы мен маңайы арнайы техникамен, соның ішінде георадарлардың көмегімен тексерілгенімен, бастапқы іздеу нәтижесіз болған еді.
Бұған дейін Жангелдин ауылындағы сарайдан ерлі-зайыптының мәйіттері табылған болатын.