Атырауда өзінде АИТВ (ВИЧ) инфекциясы бар екенін біле тұра ақылы интимдік қызмет көрсетті деген күдікпен екі адам ұсталды, – деп хабарлайды aqshamnews.kz тілшісі.
Полиция мәліметінше, 23 және 28 жастағы азаматтар 2025 жылдың желтоқсанынан бері АИТВ диагнозы қойылғаны белгілі бола тұра және арнайы медициналық есепте тұрғанына қарамастан, интимдік қызмет көрсетуді тоқтатпаған.
Ұйымдасқан қылмысқа қарсы күрес басқармасының қызметкерлері күдіктілерді ұстап, уақытша ұстау изоляторына қамады.
Аталған дерек бойынша өзінде бұл аурудың бар екенін біле тұра, басқа адамға АИТВ инфекциясын жұқтыру фактісі бойынша қылмыстық іс қозғалды.
Азаматтардың өмірі мен денсаулығына қасақана қауіп төндіру — ауыр қылмыс.
«Қазақстан Республикасының заңнамасына сәйкес, мұндай әрекеттер үшін 5 жылдан 10 жылға дейін бас бостандығынан айыру жазасы қарастырылған. Қазіргі уақытта қажетті тергеу әрекеттері жүргізілуде, жәбірленушілер анықталуда. Әрбір дерекке құқықтық баға беріледі. Әрбір кінәлі тұлға заң алдында толық жауап береді», - делінген ПД хабарламасында.