Атырауда түнгі клубтардың бірінде ер адам соққыға жығылған сәттің видеосы әлеуметтік желіде тарады, деп хабарлайды Aqshamnews.kz тілшісі.
Алдын ала мәліметке сәйкес, оқиға 18 қаңтар күні түнде «Zillon» түнгі барында болған.
Желіде жарияланған бейнежазбада жанжалдың алдымен мекеме ішінде басталғаны байқалады. Кадрлардан екі ер адамның бір адамға күш көрсеткенін көруге болады. Кейін араша түспек болған үшінші адам да соққы алған.
Төбелес одан әрі далада жалғасқан. Оқиғаға байланысты Атырау облыстық Полиция департаменті түсініктеме берді.
Ведомствоның мәліметінше, 18 қаңтар күні «102» нөміріне қаладағы ойын-сауық орындарының бірінде құқыққа қарсы әрекет жасалғаны туралы хабар түскен.
«Полиция қызметкерлері 32 және 33 жастағы екі күдіктіні анықтап, ұстады. Аталған дерек бойынша бұзақылық бабымен сотқа дейінгі тергеп-тексеру басталды. Күдіктілер уақытша ұстау изоляторына қамалды», – делінген полицияның хабарламасында.